ആണവ രഹസ്യങ്ങൾ അമേരിക്കയ്ക്ക് ചോർത്തിയോ? ചൈനീസ് ഉന്നത സൈനിക ജനറലിനെതിരെ അന്വേഷണം| China Probes Top General Zhang Youxia for Alleged Nuclear Leak to US | ലോക വാർത്ത

ചൈനയുടെ ആണവായുധങ്ങളുടെ സാങ്കേതിക വിവരങ്ങൾ ഷാങ് അമേരിക്കയ്ക്ക് കൈമാറി എന്നതാണ് പ്രധാന ആരോപണം. ചൈനീസ് നാഷണൽ ന്യൂക്ലിയർ കോർപറേഷൻ മുൻ ജനറൽ മാനേജർ ഗു ജുനിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് ഈ അന്വേഷണം. ഗു ജുനെതിരെ കഴിഞ്ഞ ആഴ്ചയാണ് അഴിമതിക്കും നിയമലംഘനത്തിനും അന്വേഷണം തുടങ്ങിയത്. ഇയാളുമായുള്ള ബന്ധമാണ് ഷാങ്ങിനെ കുടുക്കിയത്.

അഴിമതിക്കെതിരെ വിട്ടുവീഴ്ചയില്ലാത്ത സമീപനമാണ് പാർട്ടി സ്വീകരിക്കുന്നതെന്ന് വാഷിംഗ്ടണിലെ ചൈനീസ് എംബസി വക്താവ് ലി യു പെങ്യു പറഞ്ഞു. ഷീ ജിൻപിങ്ങിനെപ്പോലെ തന്നെ ചൈനയിലെ വിപ്ലവ നേതാക്കളുടെ പിൻതലമുറക്കാരനാണ് ഷാങ്. ഷീയുടെ പിതാവിനൊപ്പം പണ്ട് ഒന്നിച്ച് പോരാടിയ വ്യക്തിയായിരുന്നു ഷാങ്ങിന്റെ പിതാവും. ഇത്രയും അടുത്ത ബന്ധമുള്ള ഒരാൾക്കെതിരെയുള്ള നടപടി ചൈനീസ് സൈന്യത്തിൽ വലിയ ചർച്ചയായിട്ടുണ്ട്.

സൈന്യത്തിലെ ഉന്നത നേതൃത്വത്തിൽ ഉണ്ടായ ഈ മാറ്റങ്ങൾ തായ്‌വാനോടുള്ള ചൈനയുടെ സമീപനത്തെ ബാധിച്ചേക്കാമെന്ന് വിദഗ്ധർ കരുതുന്നു. നിലവിലെ നേതൃത്വത്തിലെ അനിശ്ചിതത്വം ഹ്രസ്വകാലത്തേക്ക് ചൈനയുടെ സൈനിക കരുത്തിനെ ബാധിക്കുമെങ്കിലും, ദീർഘകാലാടിസ്ഥാനത്തിൽ ഷീ ജിൻപിങ്ങിനോട് കൂടുതൽ വിശ്വസ്തതയുള്ള ഒരു നേതൃത്വം ഉണ്ടാകാൻ ഇത് കാരണമാകുമെന്നും വിലയിരുത്തപ്പെടുന്നു.