ഷാരൂഖ് ഖാന് വധഭീഷണി: റായ്പൂരിൽ നിന്നുള്ള അഭിഭാഷകനെ അറസ്റ്റ് ചെയ്ത് മുംബൈ പോലീസ്

റായ്പൂർ : ബോളിവുഡ് നടൻ ഷാരൂഖ് ഖാന് നേർക്ക് വധഭീഷണി മുഴക്കിയ കേസിൽ ഒരാൾ പിടിയിൽ. ഛത്തീസ്ഗഢിലെ റായ്പൂർ സ്വദേശിയായ അഭിഭാഷകൻ ഫൈസാൻ ഖാനെ ആണ് പോലീസ് അറസ്റ്റ് ചെയ്തത്.

മുംബൈ പോലീസ് ചൊവ്വാഴ്ച റായ്പൂരിൽ എത്തിയാണ് ഇയാളെ കസ്റ്റഡിയിലെടുത്തത്. ഷാരൂഖ് ഖാനെ ഭീഷണിപ്പെടുത്തിയതിനെക്കുറിച്ചുള്ള അന്വേഷണത്തിൻ്റെ ഭാഗമായി ഫൈസാൻ ഖാനെ പാണ്ഡ്രി പോലീസ് സ്റ്റേഷൻ പരിധിയിൽ നിന്ന് അറസ്റ്റ് ചെയ്തതായി മുംബൈ പോലീസ് ചൊവ്വാഴ്ച രാവിലെ റായ്പൂർ പോലീസിനെ അറിയിച്ചുവെന്ന് റായ്പൂർ സീനിയർ പോലീസ് സൂപ്രണ്ട് സന്തോഷ് സിംഗ് പറഞ്ഞു.

ഫൈസാൻ്റെ പേരിൽ രജിസ്റ്റർ ചെയ്ത ഫോൺ നമ്പറിൽ നിന്നാണ് താരത്തിന് ഭീഷണി കോൾ വന്നതെന്നാണ് പ്രാഥമിക വിവരം. ചോദ്യം ചെയ്യലിൽ തൻ്റെ ഫോൺ നഷ്ടപ്പെട്ടുവെന്നും നവംബർ 2 ന് ഖമർദിഹ് പോലീസ് സ്റ്റേഷനിൽ ഇതുമായി ബന്ധപ്പെട്ട് പരാതി നൽകിയെന്നും അഭിഭാഷകൻ പോലീസിനോട് പറഞ്ഞു.

ട്രാൻസിറ്റ് റിമാൻഡ് ആവശ്യപ്പെട്ട് മുംബൈ പോലീസ് ഫൈസാനെ റായ്പൂർ കോടതിയിൽ ഹാജരാക്കുമെന്ന് സിംഗ് പറഞ്ഞു.ലോറൻസ് ബിഷ്‌ണോയ് സംഘത്തിൽ നിന്ന് സൽമാൻ ഖാനെതിരെ നിരവധി ഭീഷണികൾ വന്നതിന് പിന്നാലെയാണ് ഷാരൂഖ് ഖാനെതിരെയും ഭീഷണി ഉയർന്നത്.