സംസ്ഥാനത്ത് സൂര്യാഘാതത്തെ തുടര്‍ന്നുള്ള മരണങ്ങള്‍ കൂടുന്നു, ഇന്ന് മലപ്പുറത്ത് ഒരു മരണം

മലപ്പുറം: സംസ്ഥാനത്ത് കടുത്ത ചൂട് തുടരുന്നതിനിടെ വീണ്ടും സൂര്യാഘാതമേറ്റ് മരണം. മലപ്പുറം സ്വദേശിയാണ് സൂര്യാഘാതമേറ്റ് മരിച്ചത്. മലപ്പുറം പടിഞ്ഞാറ്റുമുറി സ്വദേശി മുഹമ്മദ് ഹനീഫയാണ് കോഴിക്കോട് മെഡിക്കല്‍ കോളേജ് ആശുപത്രിയില്‍ മരിച്ചത്. വയലില്‍ ജോലി ചെയ്യുന്നതിനിടെ കുഴഞ്ഞുവീഴുകയായിരുന്നു.

ഇന്നലെയാണ് സൂര്യതാപമേറ്റത്. ഇന്നലെ ഉച്ചയ്ക്ക് കുഴഞ്ഞുവീണ ഹനീഫയെ ആശുപത്രിയില്‍ എത്തിക്കുകയായിരുന്നു. ഇന്ന് രാവിലെയാണ് മരണം സംഭവിച്ചത്. വ്യാഴാഴ്ച രാവിലെയോടെ മരണം സ്ഥിരീകരിക്കുകയായിരുന്നു. പോസ്റ്റ്‌മോര്‍ട്ടത്തിന് ശേഷം മൃതദേഹം കുടുംബത്തിന് വിട്ടുനല്‍കും.

അതേസമയം സൂര്യാഘാതത്തെ തുടര്‍ന്നുള്ള മരണങ്ങള്‍ കഴിഞ്ഞ ദിവസങ്ങളില്‍ പാലക്കാട്, തൃശൂര്‍ ജില്ലകളില്‍ സ്ഥിരീകരിച്ചിരുന്നു. മെയ് 15 വരെ സംസ്ഥാനത്ത് കനത്ത ചൂടായിരിക്കുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്.