പതിനായിരക്കണക്കിന് ആളുകൾ ഒഴുകിവരുന്ന കേന്ദ്രമായി നിയമസഭ മാറി: സ്പീക്കർ എ.എൻ ഷംസീർ

അന്താരാഷ്ട്ര പുസ്തകോത്സവം തുടങ്ങിയതോടെ ദിനം്രപതി പതിനായിരക്കണക്കിന് ആളുകൾ ഒഴുകിവരുന്ന ഒരു കേന്ദ്രമായി നിയമസഭ മാറിയെന്ന് സ്പീക്കർ എ.എൻ ഷംസീർ. കേരള നിയമസഭാ അന്താരാഷ്ട്ര പുസ്തകോത്സവം രണ്ടാം പതിപ്പിന്റെ ഔദ്യോ​ഗിക ഉദ്ഘാടന ചടങ്ങിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
നിയമസഭയ്ക്കകത്ത് പൊതുജനങ്ങൾക്കും വിദ്യാർത്ഥികൾക്കും കയറാനും ലൈബ്രറിയും മ്യൂസിയവും കാണുവാനുമുള്ള അവസരം പുസ്തകോത്സവത്തിനോട് അനുബന്ധിച്ച് ലഭിക്കും. ഈ പുസ്തകോത്സവം കൂട്ടായ പരിശ്രമത്തിന്റെ വിജയമാണെന്നും അദ്ദേഹം കൂട്ടിച്ചേർത്തു. വായനയാണ് ലഹരി എന്ന സന്ദേശം പ്രചരിപ്പിച്ചുകൊണ്ടാണ് ഇത്തരമൊരു പുസ്തകോത്സവം സംഘടിപ്പിച്ചിട്ടുള്ളത്. പ്രായവത്യാസമില്ലാതെ എല്ലാ വിഭാ​ഗത്തിൽപ്പെട്ടവരും വരുന്നകാഴ്ചയാണ് പുസ്തകോത്സവത്തിൽ കാണാൻ കഴിയുന്നതെന്നും സ്പീക്കർ പറഞ്ഞു.
വായന ഏറ്റവും കൂടുതൽ പ്രോത്സഹിപ്പിക്കേണ്ടത് വിദ്യാർഥികൾക്കിടയിലാണെന്ന് ചടങ്ങിൽ ആശംസ അർപ്പിച്ച് സംസാരിച്ച പൊതുവിദ്യാഭ്യാസ മന്ത്രി വി. ശിവൻകുട്ടി പറഞ്ഞു. പരമാവധി സ്കൂളുകളിൽ വായനശാലകൾ ആരംഭിക്കാനുള്ള നടപടി സ്വീകരിച്ചുവരികയാണ്. വായനയുടെ വസന്തം എന്ന പ​ദ്ധതിയുടെ ഭാ​ഗമായി കഴിഞ്ഞവർഷം 10 കോടി രൂപയുടെ പുസ്തകങ്ങൾ വിദ്യാലയങ്ങളിൽ വിതരണം ചെയ്തുവെന്നും അദ്ദേഹം അറിയിച്ചു.
നിയമസഭാ പുസ്തകോത്സവം വായനാലോകം ഏറ്റെടുത്തു എന്നതാണ് മേളയുടെ രണ്ടാം പതിപ്പിലൂടെ കാണാൻ കഴിയുന്നതെന്ന് ഭക്ഷ്യ-പൊതുവിതരണ വകുപ്പ് മന്ത്രി ജി. ആർ അനിൽ പറഞ്ഞു.
സവിശേഷതകൾക്കൊണ്ട് സമ്പന്നമാണ് കേരള നിയമസഭയെന്ന് ​ഗതാ​ഗത വകുപ്പ് മന്ത്രി ആന്റണി രാജു പറഞ്ഞു. ഇന്ത്യക്ക് ആകെ മാതൃകയായ നിരവധി നിയമ നിർമ്മാണം നടത്തിയിട്ടുള്ള മഹത്തായ സഭയുടെ പുതിയ സംരംഭമാണ് പുസ്തകോത്സവം. ഈ സംരംഭം കേരളത്തിന്റെ സാംസ്കാരിക ചരിത്രത്തിന്റെ തന്നെ ഭാ​ഗമായി മാറുകയാണെന്നും അദ്ദേഹം കൂട്ടിച്ചേർത്തു.
വരാനിരിക്കുന്ന തലമുറയേയും ഈ തലമുറയേയുമെല്ലാം വായനയുടെ ലോകത്തേക്ക് കൂട്ടിക്കൊണ്ട് പോകാൻ ഈ പുസ്തകോത്സവം വലിയ പ്രേരണമായി മാറുമെന്ന് പ്രതിപക്ഷ നേതാവ് വി.ഡി സതീശൻ പറഞ്ഞു. അന്ധകാരം നിറഞ്ഞ ഈ കെട്ടകാലത്ത് വെളിച്ചവുമായി കടന്നുവരേണ്ടത് പുസ്തകങ്ങളും എഴുത്തുകാരുമാണെന്നും അദ്ദേഹം പറഞ്ഞു.