ലേഡി സൂപ്പർസ്റ്റാർ വിളി ഇനി വേണ്ട : തൻ്റെ ആരാധകരോട് അഭ്യർത്ഥനയുമായി നയൻതാര

ചെന്നൈ: ലേഡി സൂപ്പർസ്റ്റാർ എന്ന പേര് ഇനി വേണ്ടെന്ന് നടി നയൻതാര. ഒരു നടി എന്ന നിലയിൽ തന്റെ യാത്രയിലുടനീളം ലഭിച്ച എല്ലാ സ്നേഹത്തിനും വിജയത്തിനും നയൻതാര തൻ്റെ നന്ദി  ആരാധകർക്ക് അറിയിച്ചു. ഇത് വ്യക്തമാക്കുന്ന ഒരു കത്തും നടി നവമാധ്യമത്തിൽ പങ്കിട്ടു.

തന്റെ ജീവിതം എപ്പോഴും ഒരു തുറന്ന പുസ്തകമാണെന്നും ആരാധകരുടെ സ്നേഹവും പിന്തുണയും അതിനെ കൂടുതൽ സവിശേഷമാക്കിയിട്ടുണ്ടെന്നും നടി പറഞ്ഞു. വിജയ നിമിഷങ്ങളിൽ മാത്രമല്ല, പ്രയാസകരമായ സമയങ്ങളിലും അവർ തനിക്കൊപ്പം നിന്നിട്ടുണ്ടെന്നും നടി കത്തിൽ പറയുന്നു.

പലരും തന്നെ “ലേഡി സൂപ്പർസ്റ്റാർ” എന്ന് സ്നേഹപൂർവ്വം വിളിച്ചിട്ടുണ്ടെന്ന് നയൻതാര സമ്മതിച്ചു. ആരാധകർ നൽകുന്ന പദവിക്ക് നന്ദിയുണ്ടെങ്കിലും തന്റെ പേരിന് വ്യക്തിപരമായ പ്രാധാന്യം ഉള്ളതിനാൽ ഭാവിയിൽ നയൻതാര എന്ന് മാത്രം വിളിക്കാൻ അവർ വിനയപൂർവ്വം അഭ്യർത്ഥിച്ചു.

ഒരു നടി എന്ന നിലയിൽ മാത്രമല്ല, ഒരു വ്യക്തി എന്ന നിലയിലും അത് തന്റെ ഐഡന്റിറ്റിയെ പ്രതിനിധീകരിക്കുന്നുവെന്ന് അവർ ഊന്നിപ്പറഞ്ഞു. തന്റെ ആരാധകർ പങ്കുവയ്ക്കുന്ന സ്നേഹത്തിന്റെ ഭാഷ എല്ലാ അതിരുകളെയും മറികടക്കുമെന്ന് താൻ വിശ്വസിക്കുന്നുവെന്നും നയൻതാര വ്യക്തമാക്കി.