EBM News Malayalam

സ്‌കൂള്‍ വിദ്യാര്‍ത്ഥികള്‍ക്കായുളള ഓണ്‍ലൈന്‍ ക്ലാസിന്റെ സമയക്രമം അടുത്ത ആഴ്ച പുറത്തിറക്കുന്നു

തിരുവനന്തപുരം: സംസ്ഥാനത്തെ 40 ലക്ഷത്തോളം സ്‌കൂള്‍ വിദ്യാര്‍ത്ഥികള്‍ക്കായുളള ഓണ്‍ലൈന്‍ ക്ലാസിന്റെ സമയക്രമം അടുത്ത ആഴ്ച പുറത്തുവരും. തുടര്‍ന്ന് ഹൈസ്‌കൂള്‍ മുതലുളള വിദ്യാര്‍ത്ഥികള്‍ക്ക് ദിവസം രണ്ട് മണിക്കൂറെങ്കിലും ക്ലാസ് ഉറപ്പാക്കാനാണ് ശ്രമിക്കുന്നത്. അതേസമയം ടി വി, ഇന്റര്‍നെറ്റ് സൗകര്യമില്ലാത്തവരെ സ്‌കൂളുകളില്‍ എത്തിച്ച് ഓണ്‍ലൈനായി ക്ലാസ് കേള്‍പ്പിക്കാനാണ് ഉദ്ദേശം. എന്നാല്‍ ഓണ്‍ലൈന്‍ ക്ലാസുകള്‍ ഒരുക്കാന്‍ സര്‍ക്കാരിന്റെ പ്രധാന ആശ്രയം കൈറ്റിന് കീഴിലുളള വിക്ടേഴ്‌സ് ചാനലാണ്.

ടിവിയിലൂടെയും യൂട്യൂബിലൂടെയും സമഗ്രശിക്ഷ പോര്‍ട്ടല്‍ വഴിയും ക്ലാസുകള്‍ കാണാവുന്നതാണ്. അര മണിക്കൂറായിരിക്കും ഒരു ക്ലാസിന്റെ ദൈര്‍ഘ്യം. ഒന്നാം ക്ലാസുകാര്‍ക്കും പ്ലസ് വണ്‍കാര്‍ക്കും ക്ലാസ് ഉണ്ടാകില്ല. പ്ലസ്ടുക്കാര്‍ക്കും പത്താംക്ലാസുകാര്‍ക്കും ദിവസം നാലോ അഞ്ചോ വിഷയങ്ങളില്‍ ക്ലാസ് ഉറപ്പിക്കും. എല്‍പി ക്ലാസുകാര്‍ക്ക് ഒരു ദിവസം ഒരു ക്ലാസേ ഉണ്ടാകുകയുള്ളു. അതേസമയം വിദ്യാര്‍ത്ഥികള്‍ ഓണ്‍ലൈനില്‍ ക്ലാസ് കേള്‍ക്കുന്നുണ്ടോയെന്ന് അതത് ക്ലാസ് ടീച്ചര്‍മാര്‍ ഉറപ്പിക്കണം.

എന്നാല്‍ ക്ലാസുകള്‍ക്ക് ശേഷം സംശയങ്ങള്‍ പരിഹരിക്കാന്‍ ക്ലാസ് ടീച്ചര്‍മാര്‍ തന്നെ മുന്‍കൈ എടുക്കണം. ടി വി, ഇന്റര്‍നെറ്റ് സൗകര്യമില്ലാത്ത വിദ്യാര്‍ത്ഥികള്‍ക്ക് ക്ലാസ് ടീച്ചര്‍മാരുടെ നേതൃത്വത്തില്‍ ക്ലാസ് ഉറപ്പാക്കണം. സമീപത്തുളള സ്‌കൂളുകളോ ഗ്രന്ഥശാലകളോ ഇതിനായി സജ്ജീകരിക്കാനാണ് ആലോചിക്കുന്നത്.

Comments are closed.