EBM News Malayalam

പി.വി അന്‍വര്‍ എംഎല്‍എക്കെതിരെ കള്ളപ്പണ ഇടപാടില്‍ എന്‍ഫോഴ്സ്മെന്റ് ഡയറക്ടറേറ്റ് അന്വേഷണമാരംഭിച്ചു

മലപ്പുറം: പി.വി അന്‍വര്‍ എംഎല്‍എക്കെതിരെ കള്ളപ്പണ ഇടപാടില്‍ എന്‍ഫോഴ്സ്മെന്റ് ഡയറക്ടറേറ്റ് അന്വേഷണമാരംഭിച്ചു. പശ്ചിമാഫ്രിക്കന്‍ രാജ്യമായ സിയറ ലിയോണിലെ സ്വര്‍ണ ഖനനത്തിന്റെ സാമ്പത്തിക ഉറവിടം,മംഗലാപുരം ബെല്‍ത്തങ്ങാടിയിലെ ക്രഷര്‍ ഇടപാടിലെ സാമ്പത്തിക തട്ടിപ്പ്, പി.വി അന്‍വറിന്റെ പേരിലുള്ള കമ്പനികളും ഇവയുടെ ഇടപാടുകള്‍, ബെനാമി കമ്പനികള്‍ എന്നിവയെക്കുറിച്ചാണ് അന്വേഷണം തുടങ്ങിയിരിക്കുന്നത്. ബെല്‍ത്തങ്ങാടിയിലെ ക്രഷര്‍ പിവി അന്‍വറിന് വില്‍പന നടത്തിയ കാസര്‍ഗോഡ് സ്വദേശി ഇബ്രാഹിം, തട്ടിപ്പിനിരയായ പ്രവാസി എന്‍ജിനീയര്‍ മലപ്പുറം പട്ടര്‍ക്കടവ് സ്വദേശി നടുത്തൊടി സലീം എന്നിവരോട് ജൂലൈ നാലിന് കൊച്ചി എന്‍ഫോഴ്സ്മെന്റ് ഡയറക്ടറേറ്റ് ഓഫീസില്‍ നേരിട്ട് ഹാജരാകാന്‍ ഇഡി അസിസ്റ്റന്റ് ഡയറക്ടര്‍ സുരേന്ദ്ര ഗണേഷ് കവിത്ക്കര്‍ നോട്ടീസ് നല്‍കിയിട്ടുണ്ട്. സലീമിനോട് രാവിലെ പത്തരക്കും ഇബ്രാഹിമിനോട് ഉച്ചക്ക് ശേഷം രണ്ടരക്കും ഹാജരാകാനാണ് ആവശ്യപ്പെട്ടിരിക്കുന്നത്. പി.വി അന്‍വറുമായുള്ള ഇടപാടുകളുടെ രേഖകള്‍, കഴിഞ്ഞ 10 വര്‍ഷത്തിനുള്ളിലെ പാര്‍ടണര്‍ ഷിപ്പ് കരാറുകളുടെ വിവരങ്ങള്‍, 10 വര്‍ഷത്തെ ആദായനികുതി റിട്ടേണ്‍ വിവരങ്ങള്‍ അടക്കമുള്ളവ സഹിതം ഹാജരാകാനാണ് ആവശ്യപ്പെട്ടിട്ടുള്ളത്.
മംഗലാപുരം ബല്‍ത്തങ്ങാടി താലൂക്കിലെ തണ്ണീരുപന്ത പഞ്ചായത്തിലെ ക്രഷറില്‍ 10 ശതമാനം ഷെയറും മാസം അരലക്ഷം ലാഭവിഹിതവും വാഗ്ദാനം ചെയ്ത് 50 ലക്ഷം രൂപയാണ് പ്രവാസി എന്‍ജിനീയര്‍ മലപ്പുറം സ്വദേശി നടുത്തൊടി സലീമില്‍ നിന്നും പി.വി അന്‍വര്‍ എം.എല്‍.എ തട്ടിയെടുത്തത്. സലീമിന്റെ പരാതിയില്‍ അന്‍വറിനെതിരെ കേസെടുക്കാന്‍ പോലീസ് തയ്യറായിരുന്നില്ല. മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതിയുടെ ഉത്തരവിനെതുടര്‍ന്നാണ് അന്‍വറിനെതിരെ വഞ്ചനാകുറ്റത്തിന് പോലീസ് കേസെടുത്തത്. കേസ് അട്ടിമറിക്കാനുള്ള പോലീസ് നീക്കത്തിനെതിരെ സലീമിന്റെ ഹർജിയില്‍ ഹൈക്കോടതി ക്രൈം ബ്രാഞ്ച് അന്വേഷണത്തിന് ഉത്തരവിട്ടിരുന്നു.