EBM News Malayalam

സ്വർണം കടത്താൻ ശ്രമം; ഇംഫാല്‍ വിമാനത്താവളത്തില്‍ മലയാളി പിടിയില്‍

ന്യൂഡല്‍ഹി: മലദ്വാരത്തിൽ സ്വർണമിശ്രിതം ഒളിപ്പിച്ച് കടത്താൻ ശ്രമിച്ച മലയാളി യുവാവ് മണപ്പൂരിൽ പിടിയിൽ. കോഴിക്കോട് സ്വദേശിയായ മുഹമ്മദ് ഷരീഫാണ് ഇംഫാൽ വിമാനത്താവളത്തിൽ സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സ് ( സി ഐ എസ് എഫ്) ന്‍റെ പിടിയിലായത്. 42 ലക്ഷം രൂപ വിലവരുന്ന 909.68 ഗ്രാം സ്വര്‍ണമാണ് ഇയാളിൽ നിന്നും പിടികൂടിയത്.

മലദ്വാരത്തില്‍ നാല് പാക്കറ്റുകളിലാക്കിയാണ് ഇയാള്‍ സ്വര്‍ണം കടത്താന്‍ ശ്രമിച്ചത്. പരിശോധനയ്ക്കിടെ യാത്രക്കാരന്‍റെ മലദ്വാരത്തിൽ സ്വർണ മിശ്രിതത്തിന്‍റെ സാന്നിധ്യം കണ്ടെത്തിയ ഉദ്യോഗസ്ഥർ ഇയാളെ കസ്റ്റഡിയിലെടുക്കുകയായിരുന്നു.

കോഴിക്കോട് സ്വദേശിയായ മുഹമ്മദ് ഷെരിഫ് തിങ്കളാഴ്ച ഉച്ചയ്ക്ക് 2.40നുള്ള വിമാനത്തിൽ ഡൽഹിയ്ക്ക് യാത്ര ചെയ്യാൻ എത്തിയതായിരുന്നു. സുരക്ഷാപരിശോധനയ്ക്കിടെ സംശയം തോന്നി ചോദ്യം ചെയ്തപ്പോൾ തൃപ്തികരമായ മറുപടി ഇദ്ദേഹം നൽകിയിരുന്നില്ല. തുടർന്ന് എക്സ്-റേ പരിശോധനയ്ക്ക് വിധേയമാക്കിയതോടെ മലദ്വാരത്തിനുള്ളില്‍ ഒളിപ്പിച്ച നിലയില്‍ സ്വര്‍ണം കണ്ടെത്തി.

സ്വർണമിശ്രിതം പുറത്തെടുത്തതിന് പിന്നാലെ ഇയാൾ കുറ്റസമ്മതം നടത്തി. തുടർന്ന് വിമാനത്താവളത്തിലെ ഉദ്യോഗസ്ഥർ സി ഐഎസ് എഫ് ഉന്നത ഉദ്യോഗസ്ഥർക്കും കസ്റ്റംസിനും വിവരം കൈമാറുകയായിരുന്നു. തുടർന്ന് നടപടികൾക്കായി ഇദ്ദേഹത്തെ അധികൃതർക്ക് കൈമാറി .