Ultimate magazine theme for WordPress.

ഫ്‌ളിപ്കാർട്ടും മിൻത്രയും ചേർന്ന് 15,000 തൊഴിലവസരങ്ങളാണ് ഉത്സവകാലത്ത് സൃഷ്ടിക്കുന്നത്

യു.എസ്. റീട്ടെയിൽ ശൃംഖലയായ വാൾമാർട്ടിന്റെ പിൻബലത്തിൽ പ്രവർത്തിക്കുന്ന ഫ്‌ളിപ്കാർട്ടും, ഫ്‌ളിപ്കാർട്ടിനു കീഴിൽ പ്രവർത്തിക്കുന്ന മിൻത്രയും ചേർന്ന് 15,000 തൊഴിലവസരങ്ങൾ സൃഷ്ടിക്കുന്നു. ഫ്‌ളിപ്കാർട്ട് 4,000 തൊഴിലവസരങ്ങളും മിൻത്ര 11,000 തൊഴിലവസരങ്ങളുമാണ് സൃഷ്ടിക്കുന്നത്. ഉത്സവസീസൺ മുന്നിൽകണ്ട് പ്രവർത്തനങ്ങൾ വിപുലീകരിക്കുന്നതിന്റെ ഭാഗമായാണ് നീക്കം. ഫുൾടൈം, പാർട് ടൈം തൊഴിൽ തേടുന്നവർക്ക് സുവർണാവസരമാണ് ഇത്. ‘ഫ്‌ളിപ്കാർട്ട് എക്‌സ്ട്രാ’ എന്ന പേരിലാണ് ഓഫർ പ്രഖ്യാപിച്ചിരിക്കുന്നത്. കോവിഡ് കാലത്ത് തൊഴിൽദാനം വേഗത്തിലും സുഗമവുമാക്കുന്നതിനായി ഫ്‌ളിപ്കാർട്ട് എക്‌സ്ട്രാ എന്ന പ്ലേ സ്‌റ്റോർ ആപ്പും കമ്പനി പുറത്തിറക്കി. ഇതുവഴിയാണ് ഉദ്യോഗാർഥികൾ അപേക്ഷിക്കേണ്ടത്.

വ്യക്തിഗത വിവരങ്ങളും വിദ്യാഭ്യാസ വിവരങ്ങളും പരിശോധിച്ചശേഷം ഒരോരുത്തർക്കും യോജിച്ച മേഖലയിൽ തൊഴിൽ നൽകും. ഉത്സവകാലത്ത് ഉൽപ്പന്നങ്ങളുടെ ശേഖരണവും വിതരണവും വേഗത്തിലാക്കാനാണ് ശ്രമം. ഫ്‌ളിപ്കാർട്ടിന്റെ ഉത്സവകാല വിൽപ്പനയായ ബിഗ്ബില്യൺ ഡേയ്‌സിൽ പുതിയ റെക്കോഡ് വിൽപ്പന കൈവരിക്കാൻ കമ്പനി ശ്രമിക്കുന്നുണ്ട്. മിൻ്രതയുടെ ഉത്സവ ഓഫറായ ബിഗ് ഫാഷൻ ഫെസ്റ്റിവലും വൻ വിൽപ്പനയാണു ലക്ഷ്യമിടുന്നത്. ഇരുവരും ഓഫറുകൾ കൊണ്ട് ഉപയോക്താക്കളുടെ മനം കവരാനാണു ശ്രമിക്കുന്നത്.

പാർട്‌ടൈം ജോലി അന്വേഷിക്കുന്നവർക്ക് ഇത് മികച്ച അവസരമായിരിക്കും. രാജ്യത്തെ ചെറുകിട വ്യാപാരികൾ, കർഷകർ, എം.എസ്.എം.ഇ, കടകൾ, ഉപയോക്താക്കൾ എന്നിവർക്ക് ഇ- കൊമേഴ്‌സ് മേഖലയുടെ ഗുണങ്ങൾ ലഭ്യമാക്കുമെന്നു കമ്പനി വ്യക്തമാക്കി. ഫ്‌ളിപ്കാർട്ട് എക്‌സ്ട്രാ വഴി ജോലി നേടുന്നവർക്ക് ഇൻസന്റീവ് പദ്ധതിയും കമ്പനി വാഗ്ദാനം ചെയ്യുന്നുണ്ട്. അതായത് മികച്ച പ്രവർത്തനം കാഴ്ചവയ്ക്കുന്നവർക്കു ഉയർന്ന വേതനം ലഭിക്കും. ആളുകൾക്കു കൂടുതൽ വരുമാനം വാഗ്ദാനം ചെയ്യുന്നതു വഴി സാമ്പത്തിക മേഖലയുടെ തിരിച്ചുവരവ് വേഗത്തിലാക്കാൻ സാധിക്കുമെന്നു ഫ്‌ളിപ്കാർട്ടിന്റെ മുതിർന്ന വൈസ് പ്രസിഡന്റ് ഹേമന്ത് ബദ്രി വ്യക്തമാക്കി.

അ‌തേസമയം ഓൺലൈൻ പോർട്ടലുകളുടെ ഓഫർ വിൽപ്പനകൾക്കു രാജ്യത്ത് ഉടൻ നിയന്ത്രണം വന്നേക്കുമെന്നാണു റിപ്പോർട്ടു. ഇതിനായുള്ള ഇ- കൊമേഴ്സ് നയം അ‌ണിയറയിൽ ഒരുങ്ങുന്നുണ്ട്. പോർട്ടലുകളുടെ ഓഫർ വിൽപ്പനകൾ രാജ്യത്തെ ചെറുകിട കച്ചവടക്കാരെ പ്രതികൂലമായി ബാധിക്കുന്നതാണു കാരണം. വ്യാപാരികളും ഓഫർ വിൽപ്പനകൾക്കെതിരേ രംഗത്തെത്തിയിട്ടുണ്ട്. കോവിഡ് ലോക്ക്ഡൗൺ കാലത്ത് കടകൾ അ‌ടഞ്ഞുകിടന്നപ്പോഴും ഓൺലൈൻ പോർട്ടലുകൾക്ക് യഥേഷ്ടം വിൽപ്പന തുടരാൻ അ‌നുമതി നൽകിയത് സർക്കാരിനെ ഏറെ സമ്മർദത്തിലാക്കിയിരുന്നു.

Expertouch Media Academy – EMA
Leave A Reply

Your email address will not be published.