ഏഷ്യന്‍ മാരത്തണ്‍ ചാമ്ബ്യന്‍ഷിപ്പ് ; സ്വര്‍ണം നേടി മലയാളി താരം ഗോപി തോന്നക്കല്‍
ചൈന; ചൈനയില്‍ ഏഷ്യന്‍ മാരത്തണ്‍ ചാമ്ബ്യന്‍ഷിപ്പില്‍ മലയാളി താരം ഗോപി തോന്നക്കലിന് സ്വര്‍ണം.സൈന്യത്തിലെ മുന്‍നിര ഒാട്ടക്കാര്‍ക്ക് വേഗം നിയന്ത്രിക്കാനുള്ള പേസ്മേക്കര്‍ റണ്ണറായി ഒാടി റിയോ ഒളിമ്ബിക്സിലേക്ക് യോഗ്യത നേടിയപ്പോഴേ വയനാട്ടുകാരന്‍ തോന്നക്കല്‍ വീട്ടില്‍ ഗോപി ഇന്ത്യന്‍ അത്ലറ്റിക്സിലെ വിസ്മയമായി മാറിയിരുന്നു. റിയോയില്‍ 25ാമനായാണ് ഫിനിഷ് ചെയ്തതെങ്കിലും കരിയറിലെ ഏറ്റവും മികച്ച സമയം കുറിച്ച്‌ (2:15:25) അവന്‍ ഞെട്ടിച്ചു. ഉത്തരേന്ത്യന്‍ ഒാട്ടക്കാര്‍ മേധാവിത്വം സ്ഥാപിച്ച മാരത്തണില്‍ വയനാടന്‍ ചുരമിറങ്ങി വന്നവന്‍ ഇന്ത്യയുടെ ഒന്നാം നമ്പര്‍ ഒാട്ടക്കാരനായി മാറിയത് ചുരുങ്ങിയ കാലത്തിനുള്ളിലായിരുന്നു.
ഇൗ നേട്ടത്തിനുള്ള ഒടുവിലത്തെ അംഗീകാരമായി ഞായറാഴ്ച രാവിലെ ചൈനയിലെ ഡോണ്‍ഗുവാനില്‍ നടന്ന 16ാമത് ഏഷ്യന്‍ മാരത്തണ്‍ ചാമ്ബ്യന്‍ഷിപ്പിലെ സുവര്‍ണ നേട്ടം. ജപ്പാെന്‍റയും കൊറിയയുടെയും ലോകതാരങ്ങളെയും ഖത്തര്‍, സൗദി തുടങ്ങിയ അറബ് രാജ്യങ്ങളുടെ മേല്‍വിലാസത്തിലിറങ്ങുന്ന ആഫ്രിക്കന്‍ കരുത്തരെയും അട്ടിമറിച്ചായിരുന്നു മലയാളി താരം ചൈനീസ് മണ്ണില്‍ കൊടുങ്കാറ്റായി ആഞ്ഞടിച്ചത്. ഉസ്ബകിസ്താെന്‍റ ആന്ദ്രെ പെട്രോവ് വെള്ളിയും (2:15:51) മംഗോളിയയുടെ ബിംബാലെവ് സീവെന്ദ്രന്‍ വെങ്കലവും (2:16:14) നേടി. ഏഷ്യന്‍ ചാമ്ബ്യന്‍ഷിപ്പില്‍ സ്വര്‍ണം നേടുന്ന ആദ്യ ഇന്ത്യന്‍ പുരുഷ ഓട്ടക്കാരനായാണ് ഗോപി സ്വര്‍ണമണിഞ്ഞത്. വനിതകളില്‍ രണ്ട് ഇന്ത്യക്കാര്‍ ഏഷ്യന്‍ മാരത്തണ്‍ ചാമ്ബ്യന്‍പട്ടമണിഞ്ഞിരുന്നു. ആഷ അഗര്‍വാളും (1985) സുനിത ഗൊദാരയും .
ചുരമിറങ്ങിവന്ന താരം
ബത്തേരിയിലെ ഈരംകൊല്ലി പണിയ കോളനിയില്‍ ജനിച്ച ഗോപി ദുരിതങ്ങളെ ഒാടിത്തോല്‍പിച്ചാണ് വിജയകിരീടമണിയുന്നത്. ചെറുപ്പത്തില്‍തന്നെ അച്ഛനെ നഷ്ടമായി. അമ്മ രണ്ടാം വിവാഹം കഴിച്ചതോടെ മുത്തശ്ശി വെള്ളച്ചി മാത്രമായിരുന്നു ആശ്വാസം. കാക്കവയല്‍ സ്കൂളിലെ പഠനകാലത്ത് കായികാധ്യാപിക വിജയി ടീച്ചറുടെ കണ്ണില്‍ ഇടംപിടിക്കുന്നതോടെയാണ് ഗോപിയിലെ അത്ലറ്റ് പിറക്കുന്നത്. ഗുരു-ശിഷ്യന്‍ എന്നതില്‍നിന്ന് അമ്മയും മകനുമായിമാറി അവര്‍. അമ്മച്ചിറകിനുള്ളില്‍ പിടിച്ചുനിര്‍ത്താതെ ഉന്നതങ്ങളിലേക്ക് പറക്കാന്‍ അനുവദിച്ച വിജയി ടീച്ചര്‍ക്കു തന്നെയാണ് ഗോപി തെന്‍റ ഒാരോ നേട്ടവും സമര്‍പ്പിക്കുന്നതും.
സ്കൂള്‍കാലത്ത് സംസ്ഥാനതലത്തില്‍ 5000, 10,000 മീറ്ററുകളില്‍ കഴിവ് പ്രകടമാക്കിയ ഗോപി കോതമംഗലം എം.എ കോളജിലെത്തിയതോടെ കൂടുതല്‍ തേച്ചുമിനുക്കപ്പെട്ടു. വൈകാതെ സ്പോര്‍ട്സ് ക്വോട്ടയില്‍ കരസേനയിലുമെത്തി. ഗോപിയെന്ന കായികതാരത്തിനു മുന്നില്‍ കൂടുതല്‍ അവസരങ്ങള്‍ തുറക്കുകയായിരുന്നു അവിടെ. ഇന്ത്യന്‍-സര്‍വിസസ് കോച്ചായ സുരേന്ദ്രനു കീഴിലുള്ള കഠിനപരിശീലനം പുതിയ നേട്ടങ്ങളിലേക്കുള്ള വഴികളായി. ആദ്യം ദേശീയ തലത്തില്‍ ദീര്‍ഘദൂര ഇനങ്ങളില്‍ സ്വര്‍ണമണിഞ്ഞു മികവ് തെളിയിച്ചു. 2015 ഡല്‍ഹി ഹാഫ് മാരത്തണില്‍ വെള്ളി നേട്ടം. അടുത്തവര്‍ഷം മുംബൈ ഫുള്‍ മാരത്തണിലും വെള്ളി. 2016 സാഫ് ഗെയിംസില്‍ 10,000 മീറ്ററില്‍ സ്വര്‍ണമണിഞ്ഞു. ബഹ്റൈനിലെ ഏഷ്യന്‍ ക്രോസ്കണ്‍ട്രിയില്‍ നാലാം സ്ഥാനം. ഇൗ വര്‍ഷം ജൂലൈയില്‍ ഒഡിഷ വേദിയായ ഏഷ്യന്‍ അത്ലറ്റിക്സില്‍ 10,000 മീറ്ററില്‍ വെള്ളി നേടി. ഏറ്റവും ഒടുവിലായി ഏഷ്യന്‍ മാരത്തണില്‍ സ്വര്‍ണവുമണിഞ്ഞ് ചരിത്രനേട്ടത്തിലേക്ക് ഫിനിഷിങ്.
