EBM News Malayalam

വിലക്ക് ലംഘിച്ച് സ്ത്രീകള്‍ ശബരിമലയില്‍ എത്തിയാല്‍ കര്‍ശന നടപടിയെന്ന് ദേവസ്വം പ്രസിഡന്റ്

തിരുവനന്തപുരം: ശബരിമലയിലെ സ്ത്രീ പ്രവേശനം സംബന്ധിച്ച് നിലവിലെ നിയമം അതേപടി പാലിക്കുമെന്ന് ദേവസ്വം പ്രസിഡന്റ് എ.പത്മകുമാര്‍. ഇതു സംബന്ധിച്ച് അന്തിമ തീരുമാനം എടുക്കേണ്ടത് കോടതിയാണെന്നും നിലവിലെ നിയമം ലംഘിച്ച് ആരെങ്കിലും കടന്നു കൂടാന്‍ ശ്രമിച്ചാല്‍ കര്‍ശന നടപടി നേരിടേണ്ടി വരുമെന്നും പത്മകുമാര്‍ പറഞ്ഞു.

സ്ത്രീകളെ പ്രായഭേദമന്യേ ശബരിമലയില്‍ പ്രവേശിപ്പിക്കമെന്ന ഹര്‍ജി നിലവില്‍ സുപ്രീം കോടതി ഭരണഘടനാ ബെഞ്ചിന് വിട്ടിരിക്കുകയാണ്. ശബരിമലയില്‍ നൂറ്റാണ്ടുകളായി തുടരുന്ന ആചാരാനുഷ്ഠാനങ്ങളും വിശ്വാസങ്ങളും പരിശോധിക്കുമെന്നും ഭരണഘടന നല്‍കുന്ന അവകാശങ്ങള്‍ സ്ത്രീകള്‍ക്ക് നിഷേധിക്കപ്പെടുന്നുണ്ടെന്ന പരാതി പരിഗണിക്കുമെന്നും കോടതി സൂചിപ്പിച്ചിരുന്നു.

ശബരിമലയിലെ രീതി ഭരണഘടനാപരമായി ശരിയാണോ എന്നതു മാത്രമാണ് തങ്ങളുടെ മുന്നിലുള്ള വിഷയമെന്ന നിലപാട് ആവര്‍ത്തിച്ച കോടതി ഒരു കൂട്ടര്‍ക്ക് വിലക്ക് ഏര്‍പ്പെടുത്തുന്നത് പ്രഥമദൃഷ്ട്യാ നിലനില്‍ക്കില്ലെന്നും വ്യക്തമാക്കിയിരുന്നു. എന്തായാലും മറ്റൊരു മണ്ഡലകാലം കൂടി എത്തിനില്‍ക്കേ ശബരിമലയിലെ സ്ത്രീ പ്രവേശനം സംബന്ധിച്ച ചര്‍ച്ചകള്‍ വീണ്ടും സജീവമാകുകയാണ്.

Leave A Reply

Your email address will not be published.