രഞ്ജി ട്രോഫി : “കേരളം പതുങ്ങിയത് കുതിക്കാന്‍”-ഡേവ് വാട്ട്മോര്‍
തിരുവനന്തപുരം: സൗരാഷ്ട്രയെ തകര്‍ത്ത് തരിപ്പണമാക്കിയ ശേഷം ഡ്രസിങ് റൂമിലെത്തിയ കേരള ക്രിക്കറ്റ് അസോസിയേഷന്‍ ഭാരാവാഹികളോട് ത‍െന്‍റ മീശപിരിച്ച്‌ കോച്ച്‌ ഡേവ് വാട്ട്മോര്‍ പറഞ്ഞു ‘കേരളം പതുങ്ങിയത് ഒളിക്കാനല്ല, കുതിക്കാനാണ്. കിട്ടിയ അടി തിരിച്ചുകൊടുക്കാന്‍ പിള്ളേര്‍ക്ക് ഇപ്പോള്‍ അറിയാം. എെന്‍റ ആണ്‍കുട്ടികള്‍ ജയിക്കാന്‍ പഠിച്ചിരിക്കുന്നു.’ അതെ ഡേവ്, സമ്മര്‍ദങ്ങളിലും പ്രതിസന്ധികളിലും കേരളം ജയിക്കാന്‍ പഠിച്ചിരിക്കുന്നു. കഴിഞ്ഞ സീസണ്‍ വരെ സമനിലക്കായി കളിച്ച ടീം, എതിര്‍ ടീമിനെതിരെ ലീഡ് നേടിയാല്‍ കിട്ടുന്ന മൂന്ന് പോയന്‍റുകൊണ്ട് എല്ലാം തികഞ്ഞെന്ന് വിശ്വസിക്കുന്ന പരിശീലകര്‍, മൈതാനത്തിനകത്തും പുറത്തുമുള്ള നെറികെട്ട ഗ്രൂപ്പിസം, ഇതിനെല്ലാമിടയില്‍ ആത്മവിശ്വാസം നഷ്ടപ്പെട്ട താരനിര. ഇന്നലെവരെ ഇതായിരുന്നു കേരള ക്രിക്കറ്റ്. എന്നാല്‍, ഇന്ന് ഡേവ് വാട്ട്മോര്‍ എന്ന വിഖ്യാത പരിശീലകനുമുന്നില്‍ ക്രിക്കറ്റ് എന്തെന്ന് യുവനിര അറിഞ്ഞു തുടങ്ങിയിരിക്കുന്നു. കളിച്ച അഞ്ചുകളില്‍ നാലിലും മികച്ച വിജയം. പരാജയപ്പെട്ടത് നിലവിലെ ചാമ്ബ്യന്‍മാരായ ഗുജറാത്തിനോട് മാത്രം. ക്വാര്‍ട്ടറിലേക്ക് കടക്കാന്‍ ഇനി വെല്ലുവിളിയായി മുന്നിലുള്ളത് ഹരിയാന മാത്രം.
കഴിഞ്ഞ സീസണില്‍ മറുനാടന്‍ താരങ്ങളെ കൊണ്ടുവന്നതില്‍ ടീമിനുള്ളില്‍തന്നെ മുറുമുറുപ്പ് ഉണ്ടായിരുന്നു. രണ്ടു ചേരിയിലായി ടീം നിലകൊണ്ടു. ഫലമോ ജയിക്കാമായിരുന്ന കളികള്‍പോലും സമനില പിടിച്ചുവാങ്ങി. ജലജ് സക്സേനയുടെയും ഇഖ്ബാല്‍ അബ്ദുല്ലയുടെയും ഒറ്റയാള്‍ പ്രകടനങ്ങള്‍ എങ്ങും എത്താതെ പോയി. പക്ഷേ, പിണക്കങ്ങളെ ഇണക്കങ്ങളാക്കി മാറ്റാന്‍ ഡേവിന് വേണ്ടി വന്നത് ഒരു മാസം മാത്രം. ചെന്നൈയിലെ ക്യാമ്ബോടുകൂടി കേരളം ‘ടീം കേരള’യായി മാറുകയായിരുന്നു. ക്യാപ്റ്റന്‍ സചിന്‍ ബേബിയുടെ വാക്കുകള്‍ ഇങ്ങനെ ‘ഡേവ് വളരെ ശാന്തനാണ്. ടീമിലെ ഒരോ അംഗത്തിനും അദ്ദേഹത്തോട് എന്തും പറയാം. തോളില്‍ കൈയിട്ടുകൊണ്ട് തലക്കനമില്ലാതെ ജാടകളില്ലാതെ അദ്ദേഹമത് കേള്‍ക്കും. നല്ലതാണെങ്കില്‍ അംഗീകരിക്കും. പലപ്പോഴും ജയിക്കാവുന്ന മത്സരങ്ങളില്‍പോലും നമ്മള്‍ കളിച്ചിട്ടുള്ളത് സമനിലക്ക് വേണ്ടിയാണ്. റിസ്ക് എടുക്കാന്‍ കോച്ച്‌ തയാറാകില്ല. ഇതോടെ ഫീല്‍ഡില്‍ തീരുമാനമെടുക്കാനുള്ള ക്യാപ്റ്റെന്‍റ ചങ്കുറപ്പും പോകും. എന്നാല്‍, ഡേവ് കളിക്കാര്‍ക്കൊപ്പമാണ്. സ്വന്തം കഴിവില്‍ വിശ്വസിച്ച്‌ കളിക്കാന്‍ അദ്ദേഹം പറഞ്ഞു. ആ വിശ്വാസമാണ് ഞങ്ങളുടെ ഈ വിജയങ്ങള്‍.’
കഴിഞ്ഞ സീസണില്‍ മോശം ഫോമിനെ തുടര്‍ന്ന് ഡ്രസിങ് റൂമിലെത്തി ബാറ്റ് തല്ലിയൊടിച്ചതിന് ഏറെ പഴിക്കേ‍ണ്ട സഞ്ജു സാംസണിനെയും കേരളത്തിനു വേണ്ടി കളിക്കാനെത്തിയ ജലജ് സക്സേനയെയും രാകി മിനുക്കിയാണ് ഡേവ് ഇത്തവണ ഇറക്കിയത്. ഫലമോ കഴിഞ്ഞ സീസണില്‍ 334 റണ്‍ നേടിയ സഞ്ജു ഇതിനോടകം നേടിയത് 561 റണ്‍. ഇതില്‍ രണ്ട് സെഞ്ച്വറിയും മൂന്ന് അര്‍ധ സെഞ്ച്വറിയും. സീസണില്‍ റണ്‍വേട്ടക്കാരുടെ പട്ടികയില്‍ മൂന്നാം സ്ഥാനത്താണ് ഈ തിരുവനന്തപുരത്തുകാരന്‍. എന്നാല്‍, ഏറ്റവും കൂടുതല്‍ സിക്സറുകള്‍ പറത്തിയ പട്ടികയില്‍ ഒന്നാം സ്ഥാനത്താണ് സഞ്ജു. വിക്കറ്റ് വേട്ടക്കാരുടെ പട്ടികയില്‍ ഒന്നാം സ്ഥാനത്താണ് ജലജ് (34).
