EBM News Malayalam

നെടുമംഗല്യത്തിനും ഇഷ്ടഭര്‍ത്തൃലബ്ദിക്കും ഉമാമഹേശ്വര പ്രീതിക്കും തിരുവാതിരവ്രതം

വിശ്വാസത്തിനും ഭക്തിക്കുമൊപ്പം വികാരവിചാരങ്ങളുടെ ആഘോഷസമൃദ്ധി കൂടിയാ തിരുവാതിര ഇന്ന്. പൗര്‍ണമിയും തിരുവാതിരയും ഒരുമിച്ചുവരുന്ന ധനുമാസ രാത്രിയിലെ കൈകൊട്ടിക്കളി സ്ത്രീകളുടെ ആത്മീയ പൂര്‍ണതയുടെ ഉത്സവം കൂടിയാണ്. നെടുമംഗല്യത്തിനും ഇഷ്ടഭര്‍ത്തൃലബ്ദിക്കും ഉമാമഹേശ്വര പ്രീതിക്കും വേണ്ടിയാണ് സ്ത്രീകള്‍ തിരുവാതിരവ്രതമെടുക്കുന്നത്. അശ്വതിനാള്‍ മുതല്‍ ആരംഭിച്ചതാണ് തിരുവാതിരച്ചടങ്ങുകള്‍. ഇന്നു രാത്രി 7.52 ന് ചതുര്‍ദശി അവസാനിക്കുന്നതോടെ പൗര്‍ണമി തുടങ്ങുകയായി. വ്യാഴാഴ്ച പുലര്‍ച്ചെ 3.18 വരെ തിരുവാതിരനാളുമുണ്ട്.

ധനുമാസത്തിരുവാതിരയെക്കുറിച്ച് പല ഐതീഹ്യങ്ങളാണുള്ളത്. ശ്രീപരമേശ്വരന്‍റെ ജന്മനക്ഷത്രമാണെന്നും അതിനാല്‍ പത്‌നിയായ പാര്‍വതിദേവി ഈ നാളില്‍ തിരുനാള്‍ ആഘോഷിച്ചിരുന്നു എന്നാണ് ഒരു പക്ഷം. തീവ്ര തപസ് അനുഷ്ടിച്ച പാര്‍വതിയുടെ മുന്നില്‍ ആര്‍ദ്രമായി ശ്രീപരമേശ്വരന്‍ പ്രത്യക്ഷപ്പെട്ട് തന്‍റെ പത്‌നിയാക്കിക്കൊള്ളാമെന്ന വരദാനം നല്‍കിയത് ധനുമാസ തിരുവാതിര നാളിലാണെന്നു വിശ്വസിക്കുന്നവരുമുണ്ട്. രതീദേവിയുടെ വിലാപം കേട്ട് കനിവു തോന്നിയ പാര്‍വതി, പരമശിവനോട് അപേക്ഷിച്ച പ്രകാരം ജീവന്‍ തിരിച്ചുനല്‍കിയ ദിവസമാണ് തിരുവാതിരയെന്നും പറയുന്നു. ധനുമാസത്തിന്‍റെയും മാര്‍ഗഴിയുടെയും അവസാന ദിവസമായ 13 ന് മലബാറിലും തമിഴ്‌നാട്ടിലുമൊക്കെ തൈപ്പൊങ്കല്‍ ഉത്സവത്തിനു തുടക്കം കുറിക്കും. തിരുവിതാംകൂറില്‍ ഹരിപ്പാട്ടെയും ശുചീന്ദ്രത്തെയും ക്ഷേത്രങ്ങളില്‍ വിപുലമായ ഉത്സവാഘോഷങ്ങളാണുള്ളത്.

Comments are closed, but trackbacks and pingbacks are open.